امري تكلم رجال والحل ؟؟؟؟

السلام عليكم
الموضوع كافي عن الكلام اللي ابي اقوله
بس راح اشرحلكم كل شي عشان تعرفون اللي انا فيه وينصحني شخص لعل يكون الحل على يد واحد منكم
في البداية الوالده مو سعودية والوالد سعودي وللاسف ما عمري شفت واحد متزوج ااجنبيه وعياله وحرمته مرتاحين
اما الام تطلق وتروح وتترك عيالها يتعذبون مع مرت ابو بعدها او انها تحصل
رجال يتخلى عنها ويرميلها عيالها بديرتها وتضيع وتضيع عيالها معاها بدون
ابو او انه يكون شايب لا يعرف الأبوه ولا يعرف كيف يربيهم تحصل عنده اربع
او خمس اطفال ولا واحد من اطفاله حس ان عنده ابو يكبرون ويلقون ابوهم اما
مقعد او مخرف ومحتاج اهتمام وحرص يكون شغل الزوجه الاجنبيه تهتم فيه وعياله
يودونه ويجيبونه ويراعونه ويهتمون فيه وهم اطفال هم من يحتاج من يهتم فيهم

ما بالغ يا اخون بكلامي بس هذا اللي اعرفه واشوفه ووانا شخصياً اعرف أم
تدور ولدها تطلقت وراحت وبعد مرور سنوات طويله رجعت تدوره بس المسكينه مو
قادره تلقاه ولما تواصلت مع الشرطه قالي لزم هي تقدم بلاغ من هناك انت ما
يحقلك تبحث عنه ياناس ابي ارجع اولد لمه يمكن يدوره قالي مالك حق كلمتها
والمسكينه لا تعرف وش معنا سفاره ولا تعرف الشرطه تقولي الشرطه يبون فلوس
يبون رشوه ولا يفيدوني بشي وانا على قد حالي
واعرف شخص ثاني ابوه توفى وامه سافرت وتزوجت هناك مثل ما سمعت ان اخوانه من
ابوه طردوا امهم عشان الورث او هي راحت برغبتها بعد ما اخذت حقها من الورث
مو مهم سبب روحتها المهم ان عيالها يدورونها اللحين سعوديين عندها 3 عيال
وبنت ويدورونها المساكين يبون امهم يقولون نبي نعرف بس حييه ولا ميته ولا
قادرين يوصلون لها
ولا احد يقولي سفاره وشرطه والله لا حياة لمن تنادي حسبي الله ونعم الوكيل

ليت الدوله ترفض الزواج من الاجنبيه لان اغلب من يتزوج الاجنبيه همه الفراش
بس وما لقى سعودية ترضى بالمذله والاهانه فيكون حله يتزوج اجنبيه مالها
ظهر ومسكينه على قدحالها محد يحاسبني ولا يعاتبني

هذا مجرد كلام اقوله بس كذا بدون حصر لان المصايب اكبر من كذا اللي يشوفونها عيال الاجنبيه والزوجه نفسها
واذا احد قال شي قال هذا حقه ويحقله يتزوج هذا الشرع حلله اربعة الله اكبر
انا ما اعترض على شرع الله ممكن الشخص يبي يصون نفسه من الغلط بس ينسى لما
يصون نفسه يترتب على هذا مفاسد كثيره نتيجتها يدفعها اطفال الاجنبيه وامهم
هذا عذر كل من يايد الزواج من الاجنبيه قال ابي اصون نفسي واحيان تحصل
حرمته ما فيه الا العافية وما شاء الله مهتمه بمظهرها وجمالها بس الحجه ابي
اصون نفسي عن الخطأ والحرام طيب وين راحت حرمتك صن نفسك عندها

ما ابي اطلع أكثر عن الموضوع اللي داخل عشان

انا الصراحة مسجل بالمنتدى مخصوص عشان الموضوع هذا واضطريت اني ارد على عشر مواضيع عشان اقدر اكتبه
الوالده تزوجت الوالد وهي صغيره ما تدري وش الحياة الزوجيه والسبب مثل ما
يظن ان كل عائله فقيره اذا تزوجت بنتهم واحد غني خلاص بتعيش براحه الوالده
مثل ما عرفت منها وانا صغير انها كانت تحب واحد بس اهلها رفضوا انها تتزوجه
بعد ما تقدم لها

تزوجت وعاشت حياتها بالسعودية بعيده عن اهلها مع واحد عمره 50 سنه لما كبرت وبدت تعرف الحياة الزوجيه فتحت ولقت نفسها
مع زوج شايب حقيقته تزوجها بهدف يطلقها بوقت قريب بس شاء القدر ان الوالده
تكون حامل اضطر الوالد يجيبها لسعودية وكان خايف من ردة فعل مرت ابوي
بس مصير الحقيقه تظهر ما كان لبوي حل غير يعترف ويفتحلها بيت بالحالها
فتحلها بيت بالحالها وعاشت وصارت كل فتره ياخذها لهلها تزورهم كم شهر وترجع
وهو يكون معاها وحنا معاهم وما اخفي عليكم يا اخوان امي كانت تعاني من
ابوي لانه كان يتزوج عليها كل ما راح لديرتها مع انها تكون معاه يتزوج
ويطلق والله وعلم يمكن يكون عندنا اخوان ما اندري عنهم من ابوي .

الشخص اللي يحبها كل ما راحت يتواصل معاها الوالده بديرتهم يشوفون عادي
الحرمه تكلم اي رجال وقدام زوجها وعيالها واخوانها واللي تقوله هذا مثل
اخوي عادي تسولف معاه بس بحدود الادب مثل ما نشوف ونعرف
طبعاً عندنا الشي هذا قلت ادب وممنوع عندنا بالعادات والشرع قبل كذا

اذكرها يا اخوان والله دخلته مره بالبيت بالمجلس وانا كنت معاها صغير ما
ادري عن شي دخل ابوي وقال هذا من قالت هذا اخوي من الرضاعة ابتسم بوجها
وقال تراها بذمتك وطلع الوالد كان طيب وعلى نياته قلبه ابيض يمكن لانه كبير
بالسن وعارف ان ما بيده شي او يمكن احسن الظن الله اعلم بس شفتها بعيونه
ونبره صوته ان فيها شك لما قال تراها بذمتك وطلع ااااااه ياقلبي لما اتذكر
اللحظه هذي وامي تدخل رجال ببيت زوجها وتدعي انه اخوها من الرضاعة
والمصيبه جايبتله هدية من السعودية وتعطيه الهدية قدامي وقدام جدتي قدامي
بحكم اني بزر ما افهم شي وقاد جدتي بحكم عاداتهم انه عادي ويعتبر مثل اخوها
وقدام ابوي بحكم انه اخوها من الرضاعة

كنت بزر ما افهم شي بس ما انساها

الوالده صار عندها جوال خاص صارت تكلمه من ورانا شبه يومي وحنا بالمدرسه او بالجامعات تحسبنا ما ندري
انا كبرت وصرت اتذكر كل شي صار قبل من جياته من روحاتها هي لمحله من
طلعاتهم للمطعم من روحاتهم لسنما وانا معاهم طبعاً انا اعرف ان امي هذا
حدها معاه طلعه مثل كذا ولا اظلم امي لاني اعرف امي مهما كان
ما راح تسوي شي اكبر من كذا
كبرت وبديت افهم ان الشي هذا غلط بديت اعرف انه مو اخوها من الرضاعة بديت
احس شي بداخلي يخليني ارفض اللي تسويه امي الكلام هذا اقوله لكم ما صار
بسنه او سنتين الكلام هذا كله ممكن صار باكثر من 10سنوات وانا اختصره عليكم

كل ما يجي الصيف اكون كبرت سنه عن الصيف اللي راح وبديت افهم اكثر واكثر
صرت ارضى امي تطلع معاه لاني عارف بنتمشى ونستانس ونروح سينما ونوسع صدرونا بزر على نياتي
بس صرت ارفض اان امي تفتش قدامه اهاوشها قدامه اقولها تغطي وكانت تتغطى تاخذني على قد عقلي
بديت افهم اكثر صرت امنعها من الروحه صرت اراقبها وحاسبها صارت الوالده
تتهرب مني تقول بروح السوق وتطلع هي واختها بحجه انها بتروح السوق
يمر الليل كلها وما ترجع لا هي ولا خالتي يرجعون الساعة 1 2 الليل وانا
انتظر ليش تاخرتوا تقول السوق ويحتجون دايم بكلام يسكتوني فيه بديت احس ان
الموضوع مو سوق كل يوم سوق ؟
مرت السنوات والموضوع ماتغير
صارت امي تروح بس انا اعرف تحركاتها صارت احيان تطلع من البيت من غير ما
ادري تقول بروح لختي وانا احيان احسن الظن ما ادري لاني كنت اشك واتأكد
اتصل على خالتي واسال بناتها امي عندكم يقولون ايه ما كنت ادري انها تروح
كم ساعة وبعدها تطلع من هناك اااااااااه قلبي يتقطع وانا اتذكر الامور هذي

الوالد توفى الله يرحمه
الوالده تخون الوالد من قبل يتوفى من باب اولى تهتم فيه اكثر بعد ما يموت الوالد

صارت كل سنه تقولي قصلي تذكره بروح لهلي تحتج انها تبي تشوف اهلها اقول
طيب نجيب جدتي ترفض وتقول هي ما تبي تجي جدتي السعودية اقولها خليها تجي
بدال روحتك دامك تروحين عشانها وفرصه تحج هي ما حجت نحج مع بعض تتهرب من
الفكره هذي ولما اصر تقول مو عشان امي بس ابي اشوف خالاتك وانا ادري والله
الروحه هذي كلها لا هي عشان جدتي ولا هي عشان خالتي عشان الشخص اللي دمر
حياتنا وخلاني اكره امي ولا احب اشوفها عشان اللي بكى خواتي وبكاني قهر

وصل الموضوع لتهديد هدته حذرته كان يقول هي اللي تتصل هي اللي تجي بمحلي
وانا ما زلت طفل بس غيرتي تخليني اثور وكان هو بعد ياخذني على عقلي انا ما
ابيها هي تجي هي وهي انا اسافر لو جت هي وانا وانا


صرت اكلم ولد خالتي وكلمه وهدده وصل الموضوع لقتل وكنت ناوي اقتله فعلاً في
البداية كنت خايف من الدوله تجيب راسي بس احيان اصر على قراري اقول دولتهم
ما فيه امن لو قتلته محد بيدري كبرت شوي وعرفت ان الموضوع مو موقف على
دوله لاني بالاخير قلت خلاص يصير اللي يصير لو عرفوني بيحكمون علي بالاعدام
انا ميت ميت

بس المصيبه احن على اخواني اخاف يضيعون انا اكبر ولد بالبيت والبقين بنات وعيال صغار
وبنفس الوقت هو عنده بنات واطفال ما ابي ايتمهم واكون السبب
والاهم من هذا كله وين بنحاش من وعيد رب العالمين

والله ما عرفت وش اسوي الموضوع ما فاد بالتهديد نويته مره وجمعت شباب بفلوس
يضربونه بس كان حظه ذاك اليوم ما لقينا محله وسلم صدقوني مجنون ولا ادري
وش اسوي كان ولد خالتي ينصحني اللي بتسويه خطأ بتودي نفسك بداهية وحتى لو
ترك امك امك بتترك صارت امي تهددني لو صار شي له بدخلك السجن تبي تسجني امي
عشانه
لانه كان زي البزر اي شي يصير يبلغ امي وامي تشب علي اعصب ارفع صوتي على الوالده ومره بغيت اضربها

هي اللحين بالسعودية وكل سنه تبي تروح وانا عارف روحتها هناك عشانه وانا
كبرت وعندي جامعة وترم صيفي واكون نفسي وصعب اروح معاها صايره تروح تاخذ
راحتها هناك الله اعلم بالحال هناك الله رزقني بخوات يهدوني يشيلون عني
الوالده راحت السنه اللي راحت بالحالة ولا كنت راضي الوالده اضربت عن الاكل
وصارت تهاوش خواتي وكل ما دخلت البيت لقيت خواتي يبكون اقنعوني خواتي
اخليها تروح لاني عارف بالاخير لو طاحت بالمستشفى وكتشفوا انه محاوله
انتحار بندخل بقضايا ثانية وفضايح
خليتها تروح بعد مشاكل كثيره ولمح لها يا يمه تراني خليتك تروحين وكلي امل انك تحافظين على نفسك
ناصحناها كلمناها ما خلينا شي ذكرناها بالموت وادري خواتي من وراي ينصحونها ليل نهار

الوالده مصليه وتصوم الخميس والاثنينن بالعادة

بس للاسف الموضوع هذا ما يبي ينتهي رغم انه هو سبب دمار حياتنا وهو سبب دموع خواتي وهو سبب مشاكل البيت

الوالده اليوم كلمتني تبي تروح تقولي احجزلي تذكره ولما رفضت وتهاوشت معاها
قامت تهدد انها ما راح تاكل وانا اعرفها بتسويها وبتطيح بالمستشفى
والموضوع يكبر ويوصل لخواني اللي من ابوي وبتكون فضيه لها وانا ما ابي افضح
الوالده مهما صار وغير كذا صارت تهدد انها بتشتكي علي بالمحكمة اني
مانعها من زيارة اهلها عشان تاخذ وكاله شخص ثاني يطلعها من السعودية لان
نظام الدوله يمنع المرآه تطلع بدون ولي امرها

الوالده مدري وش اسوي فيها حتى هذاك مستغلها لا هو يبي يتزوجها ولا هو يبي
يخليها بحالها خايف من زوجته ما يقدر يتزوج عليها وغير كذا حتى لو قوى قلبه
وتزوجها انا عارف زوجته مار اح تخلي امي هندهم منتشر السحر وهناك ما جانين
ما يرحمون احد يوقف بوجيهم ومثل ما ذكرت الامن عندهم شبه معدوم انا خايف
ارفض تروح الوالده وتنتحر بالسعودية وأخاف اخليها تروح وترجع لنا بولد حرام


انا عمري 22 سنه

ما ادري يا اخوان وش اسوي اخليها تروح السنه هذي ولا ارفض انا خايف بعد لو
رفضت اكون عاق لاني عارف اني رفضي لروحتها بدخل خواتي بمتاعب و يمكن تترقد
بالمستشفى او تنتحر حتى مره بغيت اضربها وكثير ارفع صوتي عليها انا ما
ادري وش اسوي يا اخوان حالتي تعبت ولا لقيت حل كان ودي اكلم احد الدكاتره
النفسيه بالجامعة بس صعبه يعرف شكلي ووجهي فضيحة كنت بكلم شيوخ اسال
المشايخ انا عاق بامي والا لا اللي اسويه صح
ولا خطأ
اختي تقولي اسال شيخ وهو اكيد بيدلك على الصح رديت عليها قلت اساله اقوله
اخليها تروح وترجع بولد حرام والا اخليها تجلس غصب عنها وكون سبب انتحارها
؟؟؟ اقولك وش بيرد علي ؟ بيقولي عليك بالصبر والدعاء وهذي امك مهما كان
تحملها حملت فيك 9 شهور وربتك و و و هذا رد الشيخ لي الاطباء النفسانيين
راح يقولون لي امك محتاجه عاطفه ومحتاجه عاطفه فقدتها لانها تزوج رجل كبير
بالسنه ولا شافت منه العاطفه ولزم تحسسها انت بالاهتمام و و و طيب انا عارف
كل هذا وما خليت طريقه الا وتعاملت فيها مع الوالده

المصيبه لو رفضت ممكن اكون ارتكبت جريمه ولو خليتها اخاف ارتكب جريمه اكبر

ممكن احد منكم يقول خلها تروح ورح معاها حتى لو رحت معاها ما فيه فايده
هناك بتصير مشاكل كبيره وتتعب جدتي وتطيح بالمستشفى بسبب الوالده وممكن
تنحاش من البيت يعني كذا ولا كذا ما فيه فايده روحتي معاها


تكفون قولولي وش اسوي انا ما ابي ارتكب جريمه اندم عليها طول عمري ولا الوث يدي بواحد وسخ مثل هذا ويحكم علي اعدام

تكفون عطوني حل وعدوا ان الله يهدي الوالده
تكفون ابي ناس عاقله ترد علي ابي ناس تدلني على طريق صحيح ولو شخص عنده علم شرعي بالموضوع هذا
يفتيني انا عاق ؟؟؟ ولو احد عنده علم نظامي بالدوله يعني اقدر اشتكي هذاك
بالسفارة بيفيدوني شي والا بيقولون وش دخلنا ؟ ولا بيقولون من حقها دامها
راضيه وهو راضي انت وش دخلك مثل الدول اللي تسمح بالامور هذي

تعبت ياناس ونفسيتي تعبت وخواتي وخواتي تعبوا

ابي حل محسوس عارف كثير منكم راح يقول اصبر وعليك انك تدعي لها بالهداية

ابي حل محسوس حل قاطع حل ينهي المشكله تكفون فيدوني ما قمت اعرف الخطأ من الصح